Kystvakta har fått ny sjef

Fredag vart kommandør Øyvind Dunsæd i statsråd utnemd til flaggkommandør og beordra i ny stilling som sjef for Kystvakta (KV). Han følger dimed i kontreadmiral Oliver Berdal sine fotspor, som i oktober forlet sjefsjobben i KV for å ta over som sjef for Sjøforsvaret. 

Berdal tok på si side over etter viseadmiral Rune Andersen, som overtok sjefsstolen på Forsvarets operative hovudkvarter (FOH). 

– Øyvind er ein bunnsolid offiser og meget dyktig leiar. Han har brei erfaring frå Sjøforsvaret og maritime operasjonar i inn- og utland, seier Berdal om sin etterfølgjar i ei pressemelding. 

Dunsæd har bakgrunn som marinejeger, patruljeførar og hovudinstruktør i Marinejegerkommandoen. Han har også brei erfaring frå Ubåtvåpenet, kor han har vore hovudinstruktør, navigasjonsoffiser, nestkommanderande og skipssjef. 

Han har også vore innom stillingar som stabsoffiser i Nato, både i Mons i Belgia og i Northwood, Storbritannia. Som offiser på ubåt har han delteke i Operation Active Endeavour i Middelhavet. 

Dunsæd kjem frå stillinga som nestkommanderande i Forsvarets spesialstyrkar. 

– Eg er både takksam og stolt over tillita til å leie Kystvakta framover, og eg ser fram til å utvikle Kystvakta langs den kursen som er lagt, seier Dunsæd om si nye stilling. 

Kystvakten består av fem fartøy i Indre kystvakt og ti fartøy i Ytre kystvakt. Avdelingas primæroppgåve er hevding av Noregs suverenitet og ressurskontroll, men Kystvakta driv også med blant anna fiskeri, fangst- og tolloppsyn. 

Avdelinga har meir enn 900 tilsette og eit høgt aktivitetsnivå. I 2022 løyste dei ulike fartøya totalt 3455 oppdrag. 

Nytt kystvaktfartøy døypt:
– Det treng vi til de grader

KV Andenes takkar for seg – skal bli sivilt skip