Russisk atomubåt i Austersjøen

Litt etter klokka 16 var den 154 meter lange ubåten utanfor Danmarks sørlegaste by, Gedser, melder Sveriges Television. Ifølgje kringkastaren er det svært sjeldan ubåtar med atomvåpenkapasitet går inn i Austersjøen.

– Vi kan stadfeste at ein russisk ubåt i Oscar-klassen har passert gjennom dansk farvatn. Vi kan ikkje kommentere eventuell væpning, skriv pressekontakt Lars Skjoldan ved hovudkvarteret til det danske forsvaret i ein e-post til SVT.

Pressekontakt i det svenske forsvaret, major Kristina Swaan, stadfestar at ubåten kan utstyrast med kryssarmissil, men seier ho ikkje veit kva slags våpen som er om bord. Ho seier dei følgjer ubåtaktiviteten, slik dei alltid gjer. Ubåten blir anteken å vere på veg til ein marinekortesje som vanlegvis blir halden i St. Petersburg i slutten av juli.

Ubåten tilhøyrer den russiske nordflåten med base på Kolahalvøya. Normalt har han 24 kryssarmissil, ifølgje tidlegare opplysningar frå nyheitsbyrået Tass om ein ubåt i same klasse, som har Nato-nemninga Oscar. Det er same klasse som Kursk, som sokk i Barentshavet i 2000.